「文化嘅死，就係民族嘅死。」－斯卡（Scar）《鋼之鍊金術師FA》
唔記得咗係幾多年前曾經有人講過香港係「文化沙漠」，有無人知其實係用嚟形容啲咩？係形容太多人喺文化產業上面抽水抽到乾哂塘啊？定係話文化多到好似恆河沙數咁？坦白講，我唔明白。直至睇到有人話「文化沙漠」係指「香港不能孕育出文化氣息」，「沒有可供文化保存、發展的養分」咁上下意思嘅時候，我就更加成頭都係問號。
咩叫香港唔能夠孕育出文化氣息？姐係香港係文化上面係生唔到仔扯唔起旗？咩叫保存同發展嘅養分？姐係即使你有得生你都養唔大咁？咁我就覺得好奇怪，咁你平時講粗口，難道只係會用洋文？咁你落街食細蓉，你覺得佢會比碗意大利餛飩伴天使麵比你？呢啲唔係香港嘅文化咩？
香港又點會無文化？我哋嘅文化直程係集各家之大成，其實就同你可以係香港食到嘅菜系一樣咁多元化。不過，與其話無保存同發展嘅方法，倒不如話根本無從入手。人越揀擇，就會越揀唔落手，到最後一樣都無揀到，但既然有能力，點解唔可以揀哂所有嘢？
有好多朋友都會問，快活角落頭 HappyKongner 究竟係咩嚟。其實，我哋就只係幾條友，呢幾丁友希望將我哋所講嘅香港文化保存落嚟而同時宣揚開去。咁香港文化係啲乜？我哋對於香港文化嘅定義其實好簡單，只要你係香港見得到而用廣東話講出嚟係言之成理嘅，就係香港嘅文化。
然而，我哋眼見廣東話貌似日漸被唾棄，好多小學生會視「普教中」影響而視廣東話為毒草。兩文三語對香港人嚟講從來都唔係問題，但當一樣外來文化要完全取代我哋文化嘅根本，咁香港就唔會再係香港。文化會死，當我哋嘅問候語由「你老母」變成「他媽的」嘅時候，香港文化就死咗。死嘅原因唔係因為「他媽的」太好揪，而係因為我哋根本無重視過「你老母」。有人覺得我哋要警惕外來文化對香港文化嘅影響，但其實我哋自己如果企得穩，又邊會怕颱風吹得走？既然排外非我所願，我哋希望幫香港文化打穩根基。
保留香港文化究竟可以用咩方法？紙媒網媒香港都大把，但以多媒體方向實在少之又少，所以我哋決定從多媒體入手，搞一個以多媒體為主嘅文化區，屬於我哋嘅Kongner。雖則依家我哋都仲係啱啱開始做，可以講話係嚴重唔夠人。當然我哋無成本，無可能出錢請人幫手整呢樣整果樣，而且我哋仲一啲經驗都無。不過，我哋有嘅係熱誠，有嘅係信心。人哋拍啲Video有素人，搞政治有素人，點解搞文化嘢唔可以有素人？我哋生活係香港，每一日接觸到嘅就係香港嘅文化，只要作為一個香港人，其實你我都應該係香港文化嘅專家。
所以我哋希望各位睇完呢篇文之後，除咗可以了解一下呢班食飽飯無嘢做揾嘢嚟搞嘅人係度做緊啲咩之外，其實亦都想同有興趣嘗試下一展所長嘅你講，我哋絕對歡迎你成為HappyKongner嘅一份子。換句說話講，我哋係接納任何一方面嘅創作。無論你係想試下整片講自己覺得同香港文化有關嘅嘢，或者想畫想寫想唱，其實我哋都無任歡迎。
有興趣嘅朋友可以DM我哋，又或者email去happykongner@gmail.com。我哋會send一份創作藍圖比你，填咗佢，send返嚟，你就可以成為Kongner，我哋亦都會無條件支持你做任何類型嘅創作。只要你肯做，我哋就肯收。
希望大家都可以享受到文化交流嘅樂趣啦。
快活角落頭 HappyKongner
27.02.2017
#HappyKongner #快活角落頭 #HongKongCulture #香港文化 #係得果一件蕃薯幾件蛋散 #掉哪媽頂硬上
Search